由成日拖延到日日練習：用《Atomic Habits》重建你嘅練琴習慣

學音樂，好多人一開始都會諗：「我要勤力啲！我要每日練多啲！」

但我反而覺得，學生進步得快唔快，關鍵未必係夠唔夠熱血，而係有冇養成有效率練習習慣。

你可以好有心，但如果練兩日、停三日，進度唔會好得去邊。

相反，就算你每日只係練 10 至 15 分鐘，只要夠穩定，長遠都可以追得好快。

所以今次想用一本好多人都聽過嘅書——《Atomic Habits》——講下點樣將佢套落音樂學習度，特別係學鋼琴、學樂器嗰啲日常練習。

《Atomic Habits》係講乜？

《Atomic Habits》係 James Clear 寫嘅書，2018 年出版，之後好快就紅咗，因為佢唔係淨係講大道理，而係真係教你點樣建立習慣、改變行為。

書名入面個 “atomic”，唔係講原子彈嗰種「爆炸」，而係講細細粒，但力量可以好大。

即係話，你每一日做嘅小行動，表面睇落好似冇咩，但只要持續，最後個效果可以好驚人。

呢個概念放落音樂學習度，超級啱用。

因為學琴、學唱歌、學任何樂器，都唔係一晚突然開竅，而係靠你日積月累咁練返嚟。

學音樂最大問題，通常唔係唔識，而係唔夠穩定

好多學生唔係冇能力，係：

今日練好耐，之後幾日完全唔掂琴

每次坐低都唔知練乜

成日由頭彈到尾，以為自己叫做有練

覺得要有好多時間先值得開始

呢啲情況，我見得多。

問題唔係你唔想進步，而係你未建立到一個可以持續做到嘅方法。

《Atomic Habits》最值得學嘅位，就係佢提醒我哋：

唔好淨係靠意志力，要靠制度。

1. 唔好淨係得目標，要有練習系統

好多人學音樂會講：

「我想考到八級」

「我想彈到某首歌」

「我想左右手夾得好啲」

「我想唔再成日彈錯」

有目標當然好，但淨係有目標唔夠。

因為目標只係講你想去邊，但冇講你每日點樣行過去。

例如你話想進步，但你冇固定時間練、冇固定流程、次次都睇心情，咁其實好難穩定。

不如將目標變成具體系統：

每晚食完飯練 15 分鐘

一坐低先做 3 分鐘熱身

再練 5 分鐘基本功

再慢練最難嗰幾個小節

最後彈一次自己鍾意嘅歌

你會發現，一有系統，人就冇咁易拖。

2. 由細到唔會抗拒開始

好多人一開始太有火，會同自己講：

「由今日起我要每日練 1 個鐘！」

「我今個星期要搞掂成首歌！」

「我要一次過練晒所有音階！」

聽落好勁，但通常兩三日之後就散。

點解？

因為個門檻太高。你一覺得辛苦，大腦就開始想避開。

所以我成日叫學生：先唔好追求練得耐，先追求容易開始。

例如：

唔係要求自己練 1 個鐘，先要求自己坐低 5 分鐘

唔係要求彈完整首，先練 4 個 bars

唔係要求今日大進步，先做好一個問題位

你會覺得「得咁少？」

係，就係因為少，所以你先做得到；做得到，先有機會持續。

3. 將練琴變得容易開始

好多時唔係你懶，係你個環境令你難開始。

如果你每次練琴都要：

搵譜

搬櫈

開琴

搵拍子機

搵鉛筆

再諗今日練乜

未正式開始，人已經洩哂氣。

所以一個好簡單嘅方法，就係將練習環境整到一望就想開始：

本譜直接打開擺好

拍子機放固定位置

今日要練嗰頁夾定

用手機設定固定提醒時間

練琴前做一個固定動作，例如沖完涼就練

當你將「開始」變得簡單，習慣自然易養成。

4. 練得耐唔代表練得好

呢個係好多學生嘅盲點。

有啲人會話：「我今日練咗 45 分鐘！」

但如果嗰 45 分鐘都係由頭到尾亂咁重複，其實效果未必好。

有效練習唔係不停彈，係要知道自己改緊乜。

例如一個比較實際嘅練習方法可以係：

先熱身 2 至 3 分鐘

再做少少scales或者手指練習

抽最容易出錯嘅位出嚟

用慢速重複練

最後先連返前後一齊彈

你會發現，咁樣練 15 分鐘，可能仲有效過你hea彈 40 分鐘。

5. 唔好成日諗「我要逼自己練」，要變成「我係會練琴嘅人」

《Atomic Habits》有個我好鍾意嘅concept，就係身份認同。

即係唔好淨係問：「我要做到咩？」

而係問：「我想成為一個點樣嘅人？」

例如：

唔係「我要考好個試」

而係「我係一個會認真面對練習嘅人」

唔係「我要每日都逼自己練琴」

而係「我本身就係一個會每日掂下琴嘅人」

呢個心態好重要。

因為當你覺得練琴係「我其中一部分」，你就冇咁容易因為一時懶或者忙就完全甩哂。

每次你肯坐低練 10 分鐘，其實都係喺度同自己講：

「我真係一個有持續學音樂嘅人。」

6. 要有即時滿足感，唔好淨係等大成果

學音樂有時最難頂嘅位，就係進步唔會即刻見到。

你今日慢練咗，未必今晚已經彈到超smooth。

所以如果完全冇rewards，好容易放棄。

咁可以點做？

你要俾自己一啲即時嘅小滿足：

練完喺日曆打個tick

用 app 記錄自己連續練咗幾多日

每星期錄一次音，聽下自己有冇好咗

練完之後彈 3 分鐘自己最鍾意嗰首歌

唔使好大獎勵，最重要係令自己覺得：

「我做完呢件事，感覺係好嘅。」

7. 唔好追求完美，追求唔好斷纜

有啲學生一日冇練，就會開始諗：

「算啦，我又斷咗，冇用啦。」

但其實最衰唔係漏一日，係你因為漏一日就索性停晒。

所以我成日會同學生講：

今日好忙？練 5 分鐘都算

今日好攰？淨係讀譜都算

今日手感差？慢慢彈都算

重點係唔好完全斷。

你可以唔完美，但你要keep住做。

音樂進步靠嘅唔係一時爆發，係你肯唔肯一路keep住。

8. 一個好實際嘅 15 分鐘練琴法

如果你而家成日覺得自己冇時間練，可以試下呢個超簡單版本：

每日 15 分鐘

2 分鐘：坐好、放鬆、手型準備

3 分鐘：手指練習 / scales

3 分鐘：拍子、節奏或者讀譜 (mental practice)

5 分鐘：新歌最難嗰幾個位慢練

2 分鐘：彈返一首自己熟嘅，開心收尾

呢個方法好處係唔會太重壓力，但又有齊基本元素。

最重要係，你比較容易日日都做到。

9. 進步好多時係慢慢滲出嚟

有時學生會問：

點解學咗幾個月仲係好多錯？

點解成日都係同一啲位kick住？

點解好似冇乜明顯進步？

其實音樂學習唔係直線。

好多進步，最初係睇唔出嘅。可能耳仔靈咗少少、拍子穩咗少少、隻手放鬆咗少少，但未去到即刻「嘩」一聲嗰種程度。

但呢啲細微改變，先係將來彈得好嘅基礎。

所以唔好成日覺得要有好大突破先叫進步。

好多時真正有用嘅進步，都係細細步、慢慢儲返嚟。

學音樂，唔使成日燃燒自己

如果你成日覺得自己學音樂kick住，未必係你唔得，可能只係你而家用緊嘅方法太難持續。

《Atomic Habits》呢本書俾我最大嘅提醒係：

唔好等有動力先做，而係要將件事設計到冇乜動力都做得到。

對學鋼琴、學唱歌、學小提琴、學任何樂器都一樣。

你唔需要日日超高強度；你需要嘅，係一個你肯日日返去做少少嘅方法。

每日肯用心練 10 分鐘嘅學生，長遠好多時比一個一時衝好勁、之後又停好耐嘅學生走得更遠。

因為音樂唔係鬥一時爆發，

係鬥你可唔可以慢慢建立一個屬於自己嘅節奏。